50 €ko kalteordaina ipinita izan eta 3 hilabete beranduago askatu eta apurtu zen lanpara batengatik
J.O.B. kontsumitzaileak Santos Ingeniería Eléctrica SL enpresa kontratatu zuen 2016ko martxoan bere etxean, beste zenbait lanen artean, lanpara batzuk ipintzeko aurretik zeuden euskarri batzuetan. Hiru hilabete beranduago, lanpara horietako bat askatu, lurrera erori eta apurtu egin zen. J.O.B.-ren kexari enpresak erantzun zion lanpara hura jartzerakoan kakoa ondo zegoela begiratu zuela eta hortaz ondoren gertatutakoan ez zuela erantzukizunik.
J.O.B. Enkarterriko Mankomunitateko KIUBera joan zen laguntza bila, baina horren parte-harmenak ere ez zuen ezer lortu. Kontsumitzaileak Kontsumoko Arbitraje bat eskatu zuen orduan, joan zen maiatzaren 17an, aipatu enpresa Arbitraje Sisteman atxikita baitago, “150 eurotan baloratutako lanpararen birjartzea” eskatuz. Lanpara apurtuta egonda, 150 euroko kalteordaina eskatzen duela ulertu behar da.
Arbitrajea ekainaren 21ean burutu zen eta bertan EKA/ACUV-eko abokatu batek epaile bezala hartu zuen parte. Erreklamatzailea haren arrazoietan tematu zen: “(…) ezin dut ulertu profesional batek jarritako lanpara bat hiru hilabete igarota erortzea”. Enpresak lanpara jarri baino lehen kakoarekin frogak egin zituela eta egoera onean zegoela ikusi zuela errepikatu zuen eta hauxe ere argudiatu zuen: “2016ko martxotik ekainera birjarritako lanpararen erortzean eta apurtzean eragina eduki ahal izan duten gauza asko gertatu ahal izan dira”.
Arbitrajeak lana gaizki eginda zegoela ebatzi zuen: “Kakoaren azterketa zuzen batek hiru hilabeteko epean lanpara erortzea ekidin behar izan zuen”. Eta auziari amaiera eman zion laudoak erreklamatzaileari lanparen kostua ordaintzea agindu zion enpresari, balio hori ekitatean 50 eurotan zehaztuz erosketa-fakturarik ezean.
Kasu honetatik ondorio-aholku batzuk atera ditzakegu: komenigarria dela Kontsumoko Arbitraje Sisteman atxikita dauden saltokietan-enpresetan produktuak erostea eta zerbitzuak kontratatzea (bestela zenbait egoeratan beti ere konplexuagoa den bide judiziala baino ez dago); produktuen erosketa-fakturak edo tiketak gorde behar direla kontsumoko gatazkarik izatekotan neurriko kalteordaina jaso ahal izateko; eta erreklamazioa egiteak merezi duela arrazoia alde badugu eta hori frogatzerik badugu.