Zeintzuk dira nire eskubideak musika jaialdi batean?
Zeintzuk dira nire eskubideak musika jaialdi batean?
Udan, tenperaturak gora egiteaz gain, zuzeneko musikaz gozatzeko gogoak ere gora egiten du nabarmen. Honela, jaialdien denboraldia oso gertu dago, eta, honekin batera, zure artista gogokoenak zuzenean entzuteko, jende berria ezagutzeko eta bestelako esperientzia musikal bat bizitzeko aukera ezin hobea. Formatu hau, gainera, goraldi betean dago.
Hirietako ekitaldi handietatik naturan egiten diren jaialdietara, gero eta aukera gehiago daude, eta urtetik urtera kopurua handitzen ari da.
Hala ere, entretenimendu-mota honek hainbat galdera sortzen ditu kontsumitzaile gisa ditugun eskubideei dagokienez. Hori dela eta, jarraian, jaialdi batera joateko orduan dituzun eskubide batzuk aipatuko dizkizugu, agian ezagutzen ez dituzunak.
Janaria eta edaria sartzeko eskubidea
Bai, legea eskuan dugula, kanpoko janaria eta edaria sartzeko eskubidea dugu. Izan ere, Kontsumitzaile eta Erabiltzaileen Defentsarako Lege Orokorraren arabera, elikagaiak eta edariak sartzen utzi beharko litzateke, betiere kristalezko ontzietan sartzen ez badira. Are gehiago, jaialdiaren jarduera nagusia ostalaritza ez denez (gure ustez, jarduera nagusia musika-ikuskizuna baita), ezin digute inola ere ukatu kanpotik janaria edo edaria sartzea.
Horrek esan nahi du janariarekin edo kanpoko edariarekin sartzen utzi behar didatela? Ez, zoritxarrez. Eskubide hori dugun arren, garrantzitsua da azpimarratzea enpresa antolatzaileek esparrura sartzeari uko egin diezaioketela gure janaria edo edaria eramaten badugu. Honen ondorioz, gertakari horretarako prest egotea eta jaialdi bakoitzaren arau espezifikoak ezagutzea gomendatzen dugu.
Edateko urari buruz hitz egiterako orduan, gainera, gogoratu behar dugu doan jasotzeko eskubidea dugula, gaitutako iturrien bidez edo jaialdiaren antolakuntzako barra ezerdinen bidez.
Eskudirutan ordaintzeko eskubidea
Eztabaida handia sortzen duen beste alderdi bat ordaintzeko modua da. Hala, jaialdi batzuetan eskudirurik gabeko ‘cashless’ sistemak sustatzen dira ordainpeko eskumuturreko, txartel edo aplikazioen bidez, baina garrantzitsua da jakitea, indarrean dagoen legeriaren arabera, ezin diotela uko egin eskudirutan ordaintzea onartzeari.
Azaroaren 23ko 19/2018 Errege Lege Dekretuak bermatzen du kontsumitzaileek eskudiruarekin ordaintzeko eskubidea dutela Espainiako edozein merkataritza-establezimendutan. Honek jaialdiaren esparruaren barruan sartzen ditu establezimenduak, baina, berriro diogu, gerta daiteke jaialdiaren antolakuntzak metodo honekin ordaintzera behartzea, kontsumitzaile gisa eskubide hori dugula uste badugu ere.
Dirua itzultzeko eskubidea baldintzak aldatzen badira
Jaialdien programazioaren azken orduko aldaketak oso frustragarriak izan daitezke eta, zoritxarrez, gero eta ohikoagoak dira. Hori dela eta, funtsezkoa da jakitea jaialdiaren terminoak nabarmen aldatzen badira, hala nola artista nagusi bat bertan behera uztea, datak aldatzea edo kartelean aldaketa garrantzitsuren bat egitea, sarreraren zenbateko osoa itzultzeko eskubidea izango duzula. Kontsumitzaileen eta Erabiltzaileen Defentsarako Lege Orokorraren arabera, zerbitzu baten kontratuan funtsezko edozein aldaketa eginez gero, kontsumitzaileari dirua itzultzeko aukera eskaini behar zaio.
Informazio argia eta egiazkoa jasotzeko eskubidea
Jaialdien antolatzaileek ekitaldiaren alderdi guztiei buruzko informazio argia eta zehatza eman behar dute. Horren barruan sartzen dira programaziotik eta berretsitako artistetatik hasi eta elikagaiak eta edariak sartzeari buruzko arauetaraino. Publizitateari buruzko Lege Orokorrak eta Kontsumitzaile eta Erabiltzaileen Defentsarako Lege Orokorrak ezartzen dute emandako edozein informaziok egiazkoa izan behar duela eta ez duela inolako akatsik eragin behar.
Segurtasunerako eskubidea
Jaialdietako segurtasuna oinarrizko eskubidea da. Instalazio eta jarduera guztiek legeak ezarritako segurtasun-araudiak betetzen dituztela bermatu behar dute antolatzaileek. Horren barruan sartzen dira esparruaren egiturazko segurtasuna, larrialdi-zerbitzu eta osasun-zerbitzu egokiak. Autonomia Erkidego bakoitzeko Jendaurreko Ikuskizunen eta Jolas Jardueren Legeak ezartzen du zein baldintza bete behar diren bertaratuen segurtasuna bermatzeko.
Irisgarritasun-eskubidea
Ekitaldi guztiek irisgarriak izan behar dute desgaitasuna duten pertsonentzat. Desgaitasuna duten pertsonen eskubideei eta haien gizarteratzeari buruzko Lege Orokorraren arabera, jaialdiek pertsona guztien sarbidea eta parte-hartzea bermatu behar dute, haien gaitasun fisikoak edozein direla ere. Horrek barne hartzen ditu sarbide egokituak, erreserbatutako eremuak eta mugikortasun urriko pertsonentzako zerbitzu espezifikoak.
Beraz, udako jaialdiak esperientzia bikaina eta aukera interesgarria izan daitezke zure artista gogokoenez jai-esparru batean gozatzeko, betiere kontsumitzaile lez ditugun eskubideak ezagutzen baditugu. EKAtik arduratuko gara ondo informatuta eta prestatuta egon zaitezen edozein gertakizunetarako, zure kezka bakarra musikaz eta giro onaz gozatzea dela ziurtatuz. Jaialdietan ikusiko dugu elkar!