“Low cost” gimnasioen gorakada: zer jakin behar duzu izena eman aurretik?
“Low cost” gimnasioen gorakada: zer jakin behar duzu izena eman aurretik?
Azken urteotan, fitnessaren mundua nabarmen aldatu da “low cost” gimnasioen ugaritzearekin. Joera honek, nolabait, industria irauli du eta ariketa fisikorako sarbidea demokratizatu du.
Gimnasio hauen ezaugarri nagusiak prezio lehiakorrak eta eraginkortasun operatiboan duten ikuspegia dira, eta beren aurrekontuak arriskuan jarri gabe osasuna eta ongizatea hobetu nahi duten pertsona ugari erakarri dituzte.
Gainera, “low cost” gimnasioen ospea bizi-estilo aktibo eta osasuntsu bat mantentzearen garrantziari buruzko kontzientzia gero eta handiagoak bultzatu du. Bizimodu modernoa gero eta sedentarioagoa denez eta bizi-estiloarekin lotutako osasun-arazoak gero eta handiagoak direnez, pertsona askok eguneroko errutinetan ariketa fisikoa txertatzeko aukera eskuragarriak eta komenigarriak bilatzen dituzte. Testuinguru horretan, “low cost” gimnasioak irtenbide erakargarri gisa sortu dira, oinarrizko instalazio funtzionalak eskainiz prezio merkeetan.
Hala ere, pausoa eman eta gimnasio horietako batean sartu aurretik, funtsezkoa da kontsumitzaile gisa duzun esperientzian eragina izan dezaketen alderdi garrantzitsu batzuk ulertzea.
Arauketa aztergai
Gimnasioak, oro har, Jendaurreko Ikuskizunen eta Jolas Jardueren Legeak ezarritako erregulazioen mende daude, eta kirolarekin lotutako lanbideak arautzen dituzten araudi autonomikoek osatzen dituzte. Lege horiek kirol-begiraleek, entrenatzaileek eta gorputz-hezkuntzako irakasleek eskaintzen diren zerbitzuen segurtasuna eta kalitatea bermatzeko bete behar dituzten baldintzak ezartzen dituzte.
Hala ere, araudi horiek lege-oinarri sendoa ematen badute ere, kontratazioaren alderdi batzuk ez dira lege horien bidez lantzen, eta kontsumitzaileak babesteko araudiak arautzen ditu. Alde horretatik, garrantzi berezikoak dira Kontsumitzaileen eta Erabiltzaileen Lege Orokorraren Testu Bategina (azaroaren 16ko 1/2007 Legegintzako Errege Dekretuaren bidez onartua) eta Euskal Autonomia Erkidegoko Kontsumitzaileak Babesteko Legea. Lege horiek kontsumitzaileen zein zerbitzuak hornitzen dituzten enpresen eskubideak eta betebeharrak ezartzen dituzte, “low cost” gimnasioak barne.
Garrantzitsua da nabarmentzea araudi horien helburua kontsumitzaileen interesak eta eskubideak babestea dela, emandako informazioaren gardentasuna, merkataritza-transakzioen segurtasuna eta emandako zerbitzuen kalitatea bermatuz. Beraz, “low cost” gimnasioan izena eman aurretik, funtsezkoa da lege-esparru horietara ohitzea eta sektore horretan kontratazioari eta zerbitzuak emateari nola aplikatzen zaizkion ulertzea.
Zer jakin behar dugu izena eman aurretik?
1. Matrikula eta ordaintzeko modua
Gimnasio batzuek hileko kuotaz aparte matrikula bat eska dezakete. Ordaintzeko modua egiaztatzea gomendatzen dizugu, eta, horrela, aldez aurretik kopuru handiak ordaintzea saihestuko duzu.
2. Baja-baldintzak
Aldez aurretik informa zaitez baja emateko baldintzei eta epeei buruz. Mota horretako gimnasio batzuek zaildu egin dezakete prozesu hori, eta horrek arazoak ekar ditzake kide izateari uztea erabakitzen baduzu.
3. Prezio eta zerbitzuen zerrenda
Gimnasioak behartuta daude prezioak eta eskaintzen dituzten zerbitzuak argi eta garbi erakustera. Ziurtatu ondo ulertzen dituzula zure erosketan eskaintzen diren zerbitzuak.
4. Iraunaldia eta berritze automatikoa
Gimnasio batzuek egonaldi bat eska dezakete eta automatikoki berritu zure menbresia. Ziurtatu termino horiek ulertzen dituzula kontratua sinatu aurretik.
5. Langileen kualifikazioa
Gimnasioan jarduerak ematen dituzten langileen kualifikazioa egiaztatu, esperientzia segurua eta eraginkorra bermatzeko. “Low cost”-a ez da inola ere islatu behar zerbitzuaren kalitatean.
6. Onarpen-arauak
Gimnasioek onarpen-arauak ezartzeko eskubidea badute ere, arau horiek ez dute inola ere arbitrarioak edo diskriminatzaileak izan behar.
7. Datuen babesa
Irakurri arretaz datu pertsonalen babesari buruzko atalak, batez ere gimnasioak zure informazioa publizitate-helburuetarako erabiltzeko asmoa badu.
Laburbilduz, EKA/ACUVetik gogorarazten dizugu, “low cost” gimnasio batean sartu aurretik, funtsezkoa dela kontratuaren terminoak eta baldintzak ulertzea, baita kontsumitzaile gisa dituzun eskubideak ere. Arreta jarri xehetasunei, eta galdetu zerbait argi ez badago. Gogoratu gimnasioan duzun esperientzia segurua eta gogobetegarria izan behar dela, bai “low cost” gimnasio batean, edo beste edozein gimnasiotan.