EKA/ACUVen arrakasta kasu berria
Auzitegi Gorenak jada deusez deklaratu baditu ere, posizio zordunengatiko komisioak eta abusuzko berandutze-interesak oraindik agertzen dira hipoteka-kontratu eta mailegu askotan. Eta larriena: banku-erakundeek aplikatzen jarraitzen dute, eta, kasu gehienetan, bidegabe kobratutakoa ez dute itzultzen.
EKA/ACUVen, Euskal Kontsumitzaileen Alkartean, hainbat pertsona ikusi ditugu urte luzez diru-kopuru txikiak ordaindu dituztenak, benetan legez kanpokoak zirela jakin gabe. Zenbateko horiek batuta, ehunka edo milaka eurora irits daitezke.
Adibide argi bat: bazkide batek 1.740€ berreskuratu ditu
Gure bazkideetako batek, duela gutxi, erreklamazio bat aurkeztu zuen Caja Rural de Navarra erakundean, gure taldearekin batera, eta, egun batzuk geroago, 1.740 euroko diru-sarrera jaso zuen bere kontuan. Horrela, erakundeak posizio zordunengatiko komisio-klausularen eta berandutze-interesaren deuseztasuna aitortzen zuen, eta soberan kobratutako guztia itzultzen zuen.
Eta kasu hau ez da salbuespena. Gaur egun, antzeko zenbait prozedura mantentzen ditugu; horietan, bankuak baliogabetasuna partzialki onartu badu ere, kobratutako zenbateko guztiak itzultzeari uko egiten dio.
Egia esan, horrelako jardunbideak oraindik ere gertatzen dira, gehiegizkotzat jotzen dituzten epaiak gorabehera. Eta hori gertatzen da, neurri handi batean, pertsona askok ez dakitelako erreklamatzeko eskubidea dutela.
Zer da posizio zordunengatiko komisioa?
Bankuak automatikoki kobratzen duen zenbateko finkoa da, pertsona batek kuota baten ordainketa atzeratzen duenean, egun batzuk baino ez bada ere.
Teorian, “ez ordaintzearen kudeaketa-gastuengatik” justifikatzen dute. Praktikan, gehienetan ez dago hori justifikatzen duen kudeaketa errealik: ez deiak, ez gutunak, ez abisu formalak.
Horregatik, Auzitegi Gorena eta Espainiako Bankua bat datoz:
- Erakundeak komisio hori kobratu ahal izateko, kostu bat eragin dion kudeaketa erreala eta eraginkorra egin duela frogatu beharko du.
- Egiaztatzen ez badu, komisioa abusuzkoa eta deuseza da.
- Gainera, klausula horiek gardentasunik gabe idatzi ohi dira, zenbatekoa eta zein kasutan aplikatzen diren argi adierazi gabe.
Azken batean, bi aldiz zigortzen da kontsumitzailea: lehenik, berandutze-interesekin, eta, ondoren, justifikaziorik gabeko komisio batekin.
Eta berandutze-interesak?
Berandutze-interesa kuota bat garaiz ordaintzen ez denean aplikatzen den tasa da. Kontratu askotan, interes hori neurriz kanpokoa da, eta hori ere deuseztzat jo da epai askotan.
Bi kasuetan — zordun-posizioengatiko komisioa eta abusuzko berandutze-interesak —, kontsumitzaileak klausula deuseztatzea eta bidegabe kobratutako guztia itzultzea eska dezake, dagozkion legezko interesekin.
Nola jakin komisio hau kobratu dizuten?
- Berrikusi zure mailegu- edo hipoteka-kontratua. Egiaztatu «posizio zordunengatiko komisioa» edo «berandutze-interesak» aipatzen dituen klausularen bat duen.
- Eskatu laburpen edo amortizazio-koadro oso bat zure erakundeari, kargu horiek benetan aplikatu diren egiaztatzeko.
- Judizioz kanpoko erreklamazio bat aurkeztu. Gogoratu aurretiazko eta doako urratsa dela hori auzibidera jo aurretik.
- Erakundeak erantzuten ez badu edo partzialki erantzuten badu, justiziara jo behar da, non kontsumitzaileei gero eta auzitegi gehiago ari diren arrazoia ematen.
Erreklamatu: diru asko izan daiteke
Kopuru txikiak diruditenak — 3€, 9€, 15€— ehunka edo milaka eurotan bihurtu ahal dira urteak igaro ahala.
EKA/ACUVetik borrokan jarraitzen dugu bankuek legea bete dezaten eta bidegabeki kobratutakoa itzul dezaten. Horregatik, komisioa edo abusuzko interesak aplikatu dizkizutela uste baduzu, berrikusi zure kontratua eta jarri harremanetan gure talde juridikoarekin.