Etxeko etxetresna elektriko bat ez dabil. Zerbitzu teknikoari deitzen diozu eta esaten dizute: “modelo hori jada ez da fabrikatzen, ez dago piezarik”. Galdera saihestezina da: eta orain zer?
Horrelako egoerak uste baino ohikoagoak dira. Marka askok merkatuan dauden produktuak ezabatzen dituzte urte gutxira, baina horrek ez du esan nahi kontsumitzaile gisa ditugun bermeak desagertzen direnik. Hurrengo lerroetan azalduko dizugu zer eskubide dituzun zure produktua deskatalogatuta badago, legeak zer dioen ordezko piezen inguruan eta nola jokatu konponketa ukatzen badizute.
Enpresak konpontzeari uko egin diezaioke piezarik ez dagoela argudiatuz?
Ez. Modelo bat fabrikatzeari utzi izana ez da baliozko aitzakia kontsumitzaile bat konponbiderik gabe uzteko. Izan ere, araudia argia da: fabrikatzaileek ordezko piezen erabilgarritasuna bermatu behar dute gutxieneko denbora batez.
Epe hori gutxienez hamar urtekoa izango da produktua fabrikatzeari uzten zaionetik, apirilaren 27ko 7/2021 Errege Lege Dekretuak ezartzen duen bezala. Etxetresna elektrikoak edo gailu elektronikoak bezalako produktu iraunkorren kasuan, betebehar hori programatutako zaharkitzea saihesteko eta konpontzeko eskubidea babesteko pentsatuta dago.
Eta produktua asegurua badu?
Aparatua legezko berme-epearen barruan badago (gaur egun, hiru urte, baina luzatu egin daiteke saltzaileak hala eskaintzen badu), enpresak konpondu, ordezkatu edo dirua itzuli beharko du, katalogotik kanpo badago ere. Eta piezarik ez dagoelako konpondu ezin badu, irtenbide baliokidea eskaini behar du.
Baina gogoratu: ezin dute objektiboki okerragoa den ordezkapen-eredurik inposatu, edo itzulitako zenbatekoa murriztu, justifikatutako arrazoirik ez badago.
Eta aseguru barik badago?
Bermetik kanpo ere, fabrikatzaileak ordezko piezak eman behar ditu hamar urte horietan. Hala egiten ez badu, kontsumitzaileak erreklamazioa egin dezake, batez ere matxura funtsezkoa edo ohikoa bada.
Kasu horietan, funtsezkoa da beti idatzizko txosten bat eskatzea, non adieraziko baita zergatik ezin den konpondu. Dokumentu hori erabilgarria izango da balizko erreklamazio bat baloratzeko, eta zerbitzu teknikoak berak eman behar dizu, ahal izanez gero zigiluarekin edo sinadura batekin.
Zer egin ahal dut ordezko piezarik ez dagoela esaten badidate?
- Eskatu idatzizko txosten tekniko bat.
- Gorde erosketaren egiaztagiria.
- Kontsultatu modelo hori fabrikatzeari utzi zitzaionetik hamar urteko epean dagoen oraindik.
- Legezko betebehar hori betetzen ez bada, erreklamazioa egin.
EKA/ACUVetik zure kasua baloratzeko kontsumitzaileen elkarte batekin harremanetan jartzea gomendatzen dizugu. Askotan, “konpondu ezin dena” beharrezkoa ez den erosketa berri batera bultzatzeko modu bat da.
Zergatik da garrantzitsua honetaz hitz egitea?
Konpontzeko eskubidea kontsumo-eredu arduratsuago baten parte delako, produktuen balio-bizitza luzatzea eta beharrezkoak ez diren hondakinak saihestea bilatzen duena. Marka batek konponketak eragozten edo zailtzen dituenean, erosten duenaren poltsikoari ez ezik, ingurumenari ere eragiten dio.
Kontsumitzaile garen aldetik, eskubidea dugu konponbideak eskatzeko, zaharkitze programatuaren kontra joateko eta legezko betebeharrak betetzen ez direnean erreklamazioa gauzatzeko.
Antzeko egoera batean bazaude, ez utzi pasatzen. Informatu, eskatu eta jardun.